Тестот е спроведен во покраината Хебеј на специјално подготвен терен кој ја имитира површината на Месечината покриена со карпи и кратери, со рефлектирачки слој сличен на почвата на Месечината, пренесува Ројтерс. За време на верификацијата, системите за спуштање и полетување на лендерот беа проверени под различни услови на работа.
Лунарниот модул, наречен Ланјуе, што на мандарински значи „прегрнување на месечината“, е дизајниран да ги транспортира астронаутите помеѓу лунарната орбита и површината на Месечината. Исто така, ќе служи како простор за живеење, извор на енергија и центар за собирање податоци за време на нивниот престој на Месечината.
Кина веќе успешно спроведе повеќе беспилотни мисии во изминатите пет години, вклучувајќи собирање примероци и од блиската и од далечната страна на Месечината.
Доколку успешно изврши слетување со екипаж, Кина планира да развие „основен модел“ на Меѓународната станица за истражување на Месечината до 2035 година, во соработка со Русија. Планираната база би вклучувала нуклеарен реактор како извор на енергија.
