Група кардиолози за порталот „Парада“ посочија дека кратката физичка активност која трае само пет минути може да помогне. Секако, толку кратка активност нема да ги избрише негативните последици од седечкиот начин на живот или нездравата исхрана, но лекарите нагласуваат дека дури и малите навики можат да имаат големо влијание ако се практикуваат редовно.
Како корисна активност за здравјето, кардиолозите одвоија кратка прошетка, кардиологот Шаан Хуршид предупредува на штетното влијание на долгогодишното седење и истакнува: „Седечкиот начин на живот го зголемува ризикот од срцеви заболувања, дури и кај оние кои редовно вежбаат“. Тој смета дека е важно да се најде време во денот за пократки движења, а не само за долги тренинзи.
И професорката по кардиологија, Ерика Спец, истакнува дека пет минути физичка активност можат да имаат позитивен ефект не само врз телото, туку и врз умот. „Во текот на работниот ден, помеѓу состаноците, одам на кафе или едноставно се шетам. Ако не можам да ја напуштам канцеларијата, правам неколку едноставни вежби зад моето биро. Дома, го носам кучето на кратка прошетка“, објаснува таа за порталот Парада.
Редовното шетање ја подобрува циркулацијата, го намалува крвниот притисок и лошиот холестерол (ЛДЛ) и го намалува ризикот од дијабетес тип 2 и дебелина. Пешачењето е корисно и за мозокот. Спатц истакнува дека физичката активност помага во регулирањето на лимбичкиот систем, кој е одговорен за емоциите. „Кога лимбичкиот систем е во рамнотежа, полесно донесуваме рационални одлуки. Тоа е од непроценливо значење, без разлика дали на работа или дома“, додава таа.
Експертите препорачуваат да одите со брзо темпо во текот на тие пет минути, односно со доволен интензитет да останете без здив, но сепак да можете да кажувате кратки реченици. Таквото темпо ја поттикнува работата на срцето и подобрата циркулација.
За оние кои мислат дека немаат време за движење, д-р Спец има практичен совет: „Наместо состаноци што траат цел час, закажете ги за 45 минути. Искористете ги преостанатите 15 минути за прошетка“.
Со неа се согласува и доктор Куршид кој додава дека дури и телефонскиот разговор може да биде можност за пешачење, важно е само да станете и да се движите.
