Прекумерното миење, користењето силни средства, пилинзи и рибање ја оштетуваат заштитната бариера на кожата. Наместо свеж и чист тен, се јавува затегнатост, црвенило, изразени пори и чувство дека кожата постојано „реагира“, но никогаш не се смирува целосно.
Празничниот период често носи повеќе шминка и потреба од потемелно вечерно чистење, но проблемот настанува кога засилениот режим продолжува со недели. Со текот на времето, кожата станува почувствителна, а производите што порано одговарале почнуваат да создаваат иритации или тешко се впиваат.
Важно е да се нагласи дека ова може да се случи кај сите типови кожа – масна, мешана или сува. Поради нарушената бариера, кожата може истовремено да биде затегната или помасна од порано, но и склона кон неправилности.
Кое е решението?
Наместо додавање нови производи, првиот чекор е поедноставување на рутината. Поретко миење, поблаги средства за чистење и пауза од пилинзи и активни состојки ѝ овозможуваат на кожата повторно да ја воспостави рамнотежата.
Во многу случаи, доволно е лицето да се мие еднаш дневно со благо средство за чистење кое не остава чувство на затегнатост. Кога ќе ѝ се даде време, кожата често сама се смирува, реагира помалку и изгледа посвежо и поздраво.
