За да го утврдат ова, истражувачите анализирале голем број онлајн филмски рецензии. Поларизацијата се мери со гледање на распределбата на оценките – додека повеќето филмови добиваат просечни или високи оценки, филмовите што поларизираат имаат многу високи и многу ниски оценки. Со други зборови, публиката или ги сака или не ги поднесува, а таквата распределба изгледа како превртена Гаусова крива.
Џим Кери на врвот на листата
Истражувањето покажа дека филмот што најмногу ја дели публиката е „План 9 од вселената“, по што следат „Страст“ и „Самрак“. Меѓу жанровите, хорор филмовите се покажаа како најполаризирачки, по што следуваат семејните и научно-фантастичните филмови. Анализата, исто така, покажа дека термините како „нискобуџетни“ и „Исус“ често се поврзуваат со вакви филмови, како и „танц“, „мјузикл“ и „франшиза“, пренесува списанието Фар аут.
Кога станува збор за актери, Џим Кери се истакнува како актер најподложен на поларизација на сите времиња. Неговиот препознатлив, смешен хумор некои ги воодушевува, додека на други не им одговара.
Додека некои луѓе ги сакаат филмовите како „Глупав и поглупав“, други ги сметаат таквите сцени за одбивни, а истото важи и за неговите помалку признати филмови што обожавателите сепак ги ценат. Токму овие силно поделени мислења се причината зошто тој се смета за актер кој најмногу ја дели публиката.
