Научниците од Универзитетот во Мериленд анализирале речиси 50 студии и откриле дека крвната група може да игра улога во ризикот од ран мозочен удар. Луѓето со крвна група А имаат 16 отсто поголем ризик од исхемичен мозочен удар пред 60-тата година. Од друга страна, крвната група 0 е поврзана со 12 отсто помал ризик.
„Под соодветни околности, комбинацијата на одредена крвна група и други фактори може да ја зголеми можноста за формирање на згрутчување на крвта“, изјави неврологот Џејсон Хинман за Парада.
Научниците сè уште не се сигурни зошто крвната група го има овој ефект, но се претпоставува дека различни површински карактеристики на крвните зрнца може да ја зголемат веројатноста за згрутчување на крвта. Сепак, експертите нагласуваат дека нема причина за паника – вкупниот ризик останува низок.
„Нема потреба од дополнителни тестирања“, велат истражувачите, додавајќи дека се потребни повеќе податоци, особено од различни популации.
Иако не можеме да ја промениме нашата крвна група, можеме да направиме многу други работи за да го намалиме ризикот. Доктор Хинман советува да се внимава на познатите фактори на ризик како што се дебелината, високиот крвен притисок и дијабетесот. Според ЦДЦ, здравата исхрана, редовното вежбање и откажувањето од пушење може значително да помогнат.
„Генетскиот ризик не може да се промени, но можеме да контролираме други фактори и со тоа да го спречиме најлошото“, заклучи Хинман.
