Оваа година Кански филмски фестивал започнува во вторник, а пред отворањето, организаторите ги заострија правилата за облекување на црвениот тепих. Претходните години бројни ѕвезди привлекуваа внимание со предизвикувачки модни комбинации кои според многумина беа „премногу“ откривачки. Ваквите облеки често го одвлекуваа вниманието од она за што се одржува фестивалот – филмовите.
Сепак, 78-то издание на фестивалот носи и нови правила, сè за да се обезбеди поголема „пристојност“. Со овој строг потег, организаторите сакаат да го згаснат трендот „голи фустани“ на црвениот тепих за време на престижниот настан, кој станува сè попопуларен.
„Голотијата е забранета на црвениот тепих, како и во другите области каде што се одржува фестивалот. Тимот за прием на гости ќе биде должен да му забрани пристап до црвениот тепих на секој што не ги почитува овие правила“, соопштија организаторите.
Наместо „голи фустани“ и други провокативни креации, се очекува гостите, особено женскиот дел, да дојдат во поконзервативна облека – одела, смокинг и долги вечерни фустани. Дозволени се и класични мали црни фустани, коктел фустани, елегантни маички, а гостите можат да одлучат дали да носат штикли или не.
Разголени комбинации носеа Бела Хадид, Хајди Клум, Ирина Шајк, Емили Ратајковски, Вини Харлоу, Наташа Поли и многу други ѕвезди.
