Виртуелните вработени ќе добијат работа со полно работно време, изјави Џејсон Клинтон, менаџер од висок ранг во технолошката компанија Антропик.
Агентите базирани на вештачка интелигенција обично се фокусираат на специфична задача што може да се програмира.
Во областа на безбедноста, ова значи автономни агенти на вештачка интелигенција кои реагираат на предупредувања за „фишинг“ и други индикатори за закана.
Виртуелните вработени би ја однеле таа автоматизација чекор понатаму.
Овие идентитети на вештачката интелигенција би имале свои „сеќавања“, свои улоги во компанијата, па дури и свои корпоративни сметки и лозинки, пренесува Аксиос.
Џејсон Клинтон верува дека појавата на виртуелни вработени на работното место ќе биде следната фаза во развојот на вештачката интелигенција, но предупредува дека тоа може да создаде нови безбедносни проблеми, бидејќи вработените со вештачка интелигенција би можеле да излезат од контрола и да се пробијат во внатрешните системи на компанијата.
Антропик е американска стартап компанија за вештачка интелигенција основана во 2021 година, која разви голем јазичен модел наречен Клод, кој е конкурент на алатката ЧетГПТ на Опен АИ и Џеминај на Гугл.
Најновиот модел на Антропик беше претставен на 24 февруари под името Клод 3.7 Сонет, а корисниците можат да избираат помеѓу брз одговор и побавен и повнимателен одговор на четбот.
