Во 1981 година, во античко село во Македонија, познато како Тумба Маџари, е откриена глинена скулптура наречена Големата Мајка. Се смета дека необичната коцкаста форма на долниот дел од телото на жената го имитира дизајнот на куќите од камено време што таа требало да ги заштити пред речиси 8.000 години, пренесува Лајв сајенс.
Теракотата Голема Мајка е висока 39 сантиметри. Горната половина од скулптурата прикажува човечка фигура со истакнат нос, папок и гради, како и линеарни очи поставени под заоблените веѓи. Рацете на жената се свиткани надолу кај лактите, а дланките се поставени рамно на нејзината коцкаста долна половина. Косата ѝ е собрана во опавче или плетенка на задниот дел од главата, а траги од кафеава боја останaти на челото, можеби укажуваaт на шишки.
Големата Мајка била пронајдена во една куќа во населбата Тумба Маџари, за која археолозите сметаат дека била користена во периодот меѓу 5800 и 5200 година п.н.е. Квадратната градба имала димензии од околу 8 на 8 метри и била изградена во традиционален неолитски стил: дрвени столбови биле испреплетени со гранки и покриени со слој глина. Во близина на центарот на куќата, која содржела огниште и печка, археолозите ја пронашле статуата на Големата Мајка, заедно со десетици цели керамички садови, чаши и бокали.
Долниот дел од Големата Мајка е во облик на кутија како и куќата каде што е пронајдена. Се чини дека се издига над куќата. Ова позиционирање сугерира дека таа го чува домот, кој е исто така дел од неа. Шупливиот долен дел навестува дека скулптурата се користела како еден вид олтар каде што се гореле темјан, сушени билки или житни жртви.
Според Археолошкиот музеј на Република Македонија, каде што се изложени артефакти од Тумба Маџари, „улогата на жената како родилка и мајка била изедначена со култ на плодноста или култ на божицата Голема Мајка“.
Други фигурини на Големата Мајка се пронајдени на неолитски европски и блискоисточни археолошки локалитети. Сепак, необичната форма на скулптурата Тумба Маџари, која одразува симбиотска врска помеѓу мајката божица и куќата, се наоѓа само на Балканот.
