Смртта на папата Франциско на 21 април резултираше со зголемување на бројот на луѓе кои од дома го гледаа филмот Конклава од 2024 година. Филмот е достапен на различни платформи и моментално се емитува на Амазон прајм видео без дополнителни трошоци за претплатниците. Дејствието на драмскиот филм се врти околу изборот на нов папа.
Конклава, со Ралф Фајнс и Стенли Тучи во главните улоги, е предводен од режисерот Едвард Бергер и беше кандидат во сезоната на награди на почетокот на оваа година, заработувајќи номинација за Оскар за најдобар филм, најдобар актер и многу други пофалби и номинации. Папата Франциско почина рано во понеделникот – ден по Велигден – на 88-годишна возраст по компликации од мозочен удар.
Гледаноста на Конклава се зголеми за 283 отсто во понеделникот кога веста за смртта на папата Франциско се рашири низ целиот свет, според Луминејт, кој ја следи гледаноста на стриминг содржините. Филмот генерирал околу 1,8 милиони прегледани минути на 20 април, до крајот на 21 април тој број достигнал 6,9 милиони прегледани минути.
Друг филм со тематика на Ватикан, драмата на Нетфликс од 2019 година „Двајцата папи“, исто така предизвика обновен интерес. Гледаноста се зголеми за 417 отсто од неделата, кога имаше 290.000 прегледани минути, до понеделник, кога достигна 1,5 милиони гледани минути.
По смртта на папата Франциско, неколку големи имиња во Холивуд споделија емотивни пораки за него на социјалните мрежи. Режисерот Мартин Скорсезе објави соопштение во кое ја нарече смртта на папата „огромна“ загуба за светот.
