Пред полетувањето, патниците често се предупредувани да го вклучат авионскиот режим или да ги исклучат своите телефони и други уреди во авионот. Повеќето автоматски го прават тоа, но понекогаш некој заборава – и веднаш се поставува прашањето: колку навистина е ризично?
Иако Европската Унија од 2022 година официјално дозволи употреба на мобилни телефони во авионите, а набргу и 5Г услугата, треба да се знае дека авионскиот режим не е само формалност.
Ги исклучува сите безжични сигнали – мобилни, ви-фи и блутут – за да се намали можноста за пречки во комуникациските системи на авионот. Особено за време на полетувањето и слетувањето, кога секоја врска во пилотската кабина е критична, оваа претпазливост има реална причина.
Еден пилот во вирално видео на Тикток објасни што може да се случи ако патниците не го вклучат авионскиот режим. Иако, како што вели тој, тоа не е „крај на светот“, може да предизвика пречки во слушалките на пилотите.
„Ако во авионот има 70, 80 или 150 патници, а само три или четири лица се обидуваат да се поврзат со мобилната кула за да примат повик, се емитуваат радиобранови. Постои можност овие бранови да ги попречат радиобрановите во слушалките што ги користат пилотите“, објаснува пилотот, додавајќи дека таквите пречки се еднакви на непријатно зуење во увото:
„Многу нервира кога се обидувате да снимите инструкции, а звучи како околу вас да зуи оса.“
Во принцип, не е катастрофа ако патникот заборави да го вклучи авионскиот режим – технологијата во современите авиони е добро заштитена.
Сепак, за да се избегне каков било ризик, патниците сè уште се замолуваат – особено за време на полетувањето и слетувањето – да ги исклучат сите безжични врски.
