„Физичката активност може да биде поважна за долгорочното здравје отколку што претходно мислевме“, истакнува коавторот на студијата Грегор Миелке од Универзитетот во Квинсленд во Австралија.
Со тоа се согласува и д-р. Ендрју Фримен, директор за кардиоваскуларна превенција во Националното еврејско здравје во Денвер, кој не бил вклучен во истражувањето. „Вежбањето е чиста магија“, вели Фримен. „Тоа ги намалува ризиците на начин на кој ниту еден лек не може. Тоа е неверојатно. Секогаш им кажувам на моите пациенти дека физичката активност е вистинскиот еликсир на младоста.“
Добрата вест е дека никогаш не е доцна да ја усвоите оваа здрава навика. Дури и оние кои почнале да вежбаат на постара возраст доживеале значителни придобивки и зголемен животен век, потврди Руји Ју, доктор по јавно здравје на Универзитетот во Бризбејн.
Покрај тоа, позитивниот ефект беше уште поизразен кај постарите возрасни лица, кои често се борат со повеќе здравствени проблеми. Нивниот ризик беше намален за дополнителни 10 до 15 проценти.
Студијата, објавена во Британскиот журнал за спортска медицина, е опишана како „најсеопфатна анализа на физичката активност од раната зрелост па наваму“. Она што ја прави посебна е тоа што ги следела активностите на испитаниците во подолг временски период.
„Ова ни овозможи да проучуваме долгорочни модели на однесување – како на пример кој останал активен, кој почнал да вежба подоцна во животот и кој се откажал – и како тие обрасци влијаат на ризикот од смрт“, објасни Миелке.
Истражувањето е спроведено според препораките на Светската здравствена организација: неделно се потребни 150 до 300 минути аеробна активност со умерен интензитет или 75 до 150 минути вежбање со висок интензитет. Вежбањето со висок интензитет значи, на пример, трчање, брзо одење или каква било активност што ве тера да се потите по само неколку минути.
Редовните аеробни вежби се покажаа како најкорисни во борбата против срцевите заболувања, водечка причина за смрт во светот. Во споредба со неактивните луѓе, оние кои вежбале најмногу имале околу 40 отсто помал ризик од смрт од кардиоваскуларни заболувања. Ризикот од смрт од рак бил намален за 25 отсто.
Најголемо зголемување на животниот век е забележано кај луѓе кои вежбале умерено најмалку 300 минути неделно. „Повеќе од тоа се чини дека не обезбедува значителни дополнителни придобивки за долговечноста“, забележува Ју.
