Научниците исто така предупредуваат за феноменот кој често се опишува со изразот „дебел, но во добра форма“.
Истражувачите следеле 85.761 лице во текот на пет години, во тој период починале 8 отсто од учесниците (7.555 луѓе). Меѓу нив имало 81,4 отсто жени, додека просечната возраст на почетокот на истражувањето изнесувала 66,4 години, пренесува Сити магазин.
Слаб човек не е синоним за здравје
Резултатите покажаа дека луѓето со прекумерна тежина (индекс на телесна маса-ИТМ 25–30) или блага дебелина (ИТМ 30–35) немале повисока стапка на смртност во споредба со оние кои имале „идеален“ ИТМ помеѓу 22,5 и 25.
Од друга страна, луѓето кои имале недоволна тежина (индекс на телесна маса под 18,5) имале 2,7 пати поголем ризик од смрт. Дури и оние на долната граница на нормална телесна тежина (ИТМ 18,5–20,0) имале двојно поголема веројатност да умрат, додека луѓето со ИТМ помеѓу 20 и 22,5 имале 27 проценти поголем ризик.
Затоа, малку зголемениот индекс на телесна маса не е толку опасен – само кај дебелина од втор степен (ИТМ 35–40) било забележано 23 проценти поголемо зголемување на смртноста.
„Неисхранетоста е сериозен фактор на ризик“
Авторката на студијата, д-р Сигрид Бјерге Грибсхолт од Универзитетската болница во Архус, забележува дека резултатите би можеле да бидат под влијание и на обратна каузалност – фактот дека многу луѓе губат тежина поради болест, а не обратно. Сепак, таа нагласува дека многу ниска телесна тежина носи сериозни ризици за долговечноста.
„Честопати болеста, а не само ниската телесна тежина, го зголемува ризикот од смрт, што може да даде впечаток дека повисокиот ИТМ е заштитен фактор. Сепак, како и во претходните студии, гледаме дека неисхранетоста останува сериозен фактор на ризик“, објаснува д-р Грибсхолт.
Истражувањето, исто така, покажа дека дури и слабите луѓе можат да бидат изложени на ризик од срцеви заболувања поради таканаречените висцерални масти – масти што се таложат длабоко во телото, околу црниот дроб, желудникот и цревата.
За разлика од „видливите“ масти под кожата, овие скриени масти значително го зголемуваат ризикот од забрзано стареење на срцето и крвните садови.
Обликот на телото исто така игра важна улога. Кај мажите со масно ткиво околу стомакот, срцето старее побрзо, додека кај жените чии масни наслаги се распределени околу колковите и бутовите, срцето е поздраво и помладо.
Заклучок
Ниту екстремна слабост ниту тешка дебелина не се патот до долговечноста. Блага дебелина не мора да значи пократок живот, но клучот за здравјето останува во рамнотежата – умерено внесување на храна, физичка активност и редовни медицински прегледи.
