Доктор Мајкл Мосли, кој често во текот на својата кариера гостувал на британскиот Канал 4, зборувал за тоа како една супер храна влијае на покачениот крвен притисок и на воспалителните процеси во организмот.
Станува збор за цвекло, храна која има бројни здравствени придобивки. Цвеклото е богато со нитрати, кои во телото се претвораат во азотен оксид, процес кој помага во ширењето на крвните садови и подобрувањето на протокот на крв, што може да го намали ризикот од срцев удар и мозочен удар.
„Цвеклото содржи големи количини нитрати. Бактериите во плунката ги претвораат во азотен оксид, што придонесува за ширење на крвните садови и подобар проток на крв до екстремитетите“, објаснува експертот, додавајќи дека дури и античките Грци и Римјани верувале во неговите лековити својства.
Според достапните студии, дневната доза на сок од цвекло може да има значително влијание врз крвниот притисок. Неколку недели дневна консумација доведоа до забележителен пад на просечните вредности на крвниот притисок, што на долг рок може да го намали ризикот од сериозни кардиоваскуларни настани.
Редовната употреба на цвекло, исто така, се покажа како корисна за функцијата на мозокот. Истражувањата покажуваат дека комбинацијата од сок од цвекло и физичка активност може да го подобри протокот на крв во деловите од мозокот одговорни за движење, па затоа учесниците кои вежбале и пиеле сок имале поактивни моторни мрежи, слични на оние кај помладите луѓе.
Заклучок на експертите: сокот од цвекло може да придонесе за поздраво срце, подобар крвен притисок и одржување на мозочните функции, па се препорачува како едноставна, природна поддршка за организмот.
