Покрај сите препораки на експерти и истражувачи, неодамна, врз основа на резултатите од студиите, на листата е додадена и препораката да се живее што е можно поблиску до морето или океанот, бидејќи близината до водата го продолжува животот, пренесува РТС.
Истражувачите од Државниот универзитет во Охајо обработиле податоци од 66.263 луѓе во нивната студија, анализирајќи ја врската помеѓу местото каде што живеат (дали е во близина на водна површина) и животниот век.
Претходните истражувања се базираа на врската помеѓу таканаречените сини простори и позитивните здравствени придобивки.
Податоците покажаа дека живеењето во близина на брегот е поврзано со подолг животен век, но исто така е изненадувачки што живеењето во урбани средини кои се наоѓаат на внатрешноста од континентот, што значи дека не се на брегот на морето или океанот, туку во близина на реки и езера, дава малку поинакви резултати.
„Се очекувало жителите на крајбрежјето да живеат околу една година подолго од просекот од 79 години, а оние кои живееле во поурбани области во близина на внатрешни реки и езера живееле во просек околу 78 години“, рече Џианјонг Ву од Државниот универзитет во Охајо, пренесува Сајенс алерт.
Постојат многу фактори кои влијаат на животниот век, оваа студија не покажува директна причина и последица, но постои значајна поврзаност помеѓу очекуваниот животен век и живеењето во близина на море или океан.
Истражувачите сугерираат дека крајбрежните области имаат помалку топли и ладни денови, подобар квалитет на воздухот и повеќе можности за рекреација отколку урбаните области во внатрешноста. Недвижностите на крајбрежјето чинат повеќе, па затоа социо-економскиот статус е многу важен.
Кога станува збор за живеење во близина на вода во внатрешноста на континентот, тимот прави разлика помеѓу руралните и урбаните средини. Живеењето во близина на вода во руралните средини го зголемува животниот век, но не толку колку живеењето во близина на брегот.
„Загадувањето, сиромаштијата, недостатокот на безбедни можности за физичка активност и зголемениот ризик од поплави се веројатни двигатели на овие разлики“, нагласува еколошкиот географ Џани Као од Државниот универзитет во Охајо.
Природата го подобрува здравјето на начини што можат да го продолжат животниот век, но тоа е само еден дел од поголемата слика што вклучува многу различни фактори.
„Мислевме дека е можно било кој тип на „син простор“ да понуди некои корисни ефекти, и бевме изненадени кога откривме толку значајна и јасна разлика помеѓу оние што живеат во близина на крајбрежните води и оние што живеат во близина на внатрешните води“, заклучи Џијањонг Ву од Државниот универзитет во Охајо.
