Русија знае кој го изврши нападот во Крокус сити, но сега истражува кој ја дал наредбата, изјави денеска претседателот Владимир Путин, посочувајќи ја Украина како веројатен виновник.
„Овој напад го извршија радикални исламисти“, рече Путин во видеоповикот со претставници на органите за спроведување на законот.
САД и нивните сојузници сега се обидуваат да ги покријат своите посредници во Киев, инсистирајќи дека Украина нема никаква врска со терористичкиот напад и дека одговорната страна е Исламска држава, истакна рускиот претседател.
„Но ние знаеме кој го изврши нападот. Сакаме да знаеме кој го нарачал“.
„Руските органи на прогонот моментално ги истражуваат сторителите, кои се приведени и изведени пред судија. Истрагата треба да биде ‘професионална, без никаква политичка пристрасност’“, рече Путин.
Повеќе од 130 луѓе беа убиени на концертното место северозападно од Москва во петокот вечерта, кога неколку вооружени мажи почнаа да пукаат во толпата и ја запалија салата. Одговорноста ја презеде терористичката група што себеси се нарекува Исламска држава-Хорасан (ИСИС-Х).
Руските безбедносни служби приведоа четворица наводни сторители, како и седуммина нивни осомничени соучесници. Мажите беа идентификувани како етнички Таџикистанци.
Бројот на загинатите во терористичкиот напад минатиот петок врз Крокус сити хол во Московскиот регион порасна на 139, откако уште две жртви починаа во болница, изјави попладнево претседателот на Рускиот истражен комитет Александар Бастрикин.
75 од жртвите во Крокус сити хол веќе се идентификувани, според високиот истражител.
„Меѓу загинатите има и три деца. Од вкупниот број, 137 загинаа на местото на нападот, двајца починаа во медицинските установи“, му рекол денеска Бастрикин на Путин.
