петок, 19 април 2024

Путин му подари на Ким Џонг Ун автомобил од руско производство

Севернокорејскиот лидер Ким Џонг Ун доби автомобил од рускиот претседател Владимир Путин како подарок „за лична употреба“, објавија официјалните медиуми, што би можело да претставува кршење на санкциите на ОН кои и Москва ги усвои против Пјонгјанг.

Фото: ЕПА

Објавено на

часот

Сподели

Двете земји воспоставија поблиски врски откако Ким и Путин се сретнаа во септември и ветија дека ќе промовираат размена во сите области додека нивната меѓународна изолација се продлабочува поради руската војна во Украина и севернокорејскиот развој на нуклеарно оружје.

Автомобилот од руско производство беше предаден на соработници на Ким на 18 февруари, објави официјалната севернокорејска новинска агенција КЦНА. Сестрата на Ким „љубезно ѝ ја пренесе на руската страна благодарноста на Ким Џонг Ун до Путин, велејќи дека подарокот служи како јасна демонстрација на посебните лични односи на највисоките лидери“, објави КЦНА.

Министерството за надворешни работи на Јужна Кореја соопшти дека внимателно ја следи соработката меѓу Русија и Северна Кореја, а истовремено ги повика двете земји да ги почитуваат резолуциите на Советот за безбедност на ОН.

„Санкциите на Советот за безбедност забрануваат директна или индиректна набавка, продажба или пренос во Северна Кореја на сите транспортни возила меѓународно категоризирани како ХС код 86 до 89, без оглед на нивното потекло, вклучувајќи ги и луксузните автомобили“, изјави портпаролот на министерството, Лим Со Сук на прес-конференција.

Портпаролот на Кремљ Дмитриј Песков за руската државна новинска агенција РИА изјави дека корејскиот лидер добил автомобил Аурус. Според веб-страницата на производителот на автомобили, автомобилот е првата руска голема луксузна лимузина. Тоа воедно е и Путиновиот претседателски автомобил.

Во септември, за време на посетата на руската вселенска станица за лансирање на Далечниот исток, Ким ја прегледа лимузината Аурус Сенат и рускиот лидер го покани да седне на задното седиште. Самиот Ким се возел до станицата со лимузина Мајбах донесена со специјален воз со кој пристигнал од Пјонгјанг.

Се верува дека Ким е страствен ентузијаст за автомобили и има голема колекција на луксузни странски возила, за кои се верува дека биле шверцувани.

Мајбахот и другите во кои е виден, вклучително и неколку лимузини на Мерцедес, Ролс-Ројс Фантом и спортско теренско возило Лексус спаѓаат во луксузни стоки на кои им е забрането да се извезуваат во Северна Кореја со резолуциите на Советот за безбедност на ОН.

Се верува дека Северна Кореја ја снабдува Русија со артилерија, ракети и балистички ракети за војната против Украина. Кремљ ниту демантираше, ниту потврди дека користи оружје од севернокорејско производство. Северна Кореја ги отфрла обвинувањата за испорака на оружје за Русија, што исто така би било кршење на санкциите на ОН.

ТОП ВЕСТИ

ПОСЛЕДНИ ВЕСТИ