Актуелниот претседател Владимир Путин се очекува да победи на овогодинешните претседателски избори, со речиси 90 отсто од гласовите, објави руската Централна изборна комисија (ЦИК).
Според ЦИК, речиси четвртина од гласовите се преброени до 21 часот по московско време, а Путин води во трката со 87,9 отсто.
Излезните анкети претходно покажаа слични трендови, при што се очекуваше шефот на државата да победи на изборите со 87,8%.
Неговиот противкандидат од Комунистичката партија, Николај Харитонов, се очекува да биде на второто место со 4,7%, потоа Владислав Даванков од партијата Нови луѓе (3,6%) и Леонид Слуцки од либералдемократите (2,5%).
Излезната анкета е спроведена меѓу 466.324 гласачи на избирачките места низ државата, пренесе РТ.
Овогодинешните избори забележаа историски висок одѕив на гласачите, кој надмина 74%, според податоците на ЦИК.
Според комисијата, обработката на гласачките ливчиња веќе е завршена во неколку руски региони. Путин добил 94,12 отсто од гласовите во Луганск и над 95 отсто во Доњецк, два украински региони што Русија делумно ги освои и ги припои, каде што граѓаните првпат гласаат на избори во Русија.
