Во нападот на 17 јули беа оштетени коловозните ленти на мостот и, според руските власти, загинаа двајца цивили. Тоа беше втор напад на виталниот премин и покажа колку е тешко да се одбрани единствената независна врска на Русија со полуостровот.
Шефот на СБУ Васил Маљук за Си-ен-ен изјави дека користениот дрон, наречен „Морско бебе“, е резултат на неколкумесечниот развој што започна веднаш по инвазијата. „Морските дронови се единствен изум на Службата за безбедност на Украина“, рече тој. „Не е вклучена ниту една приватна компанија. Со помош на овие дронови неодамна успешно го погодивме мостот на Крим, големиот јуришен брод Оленгорски Горњак и танкерот СИГ“, рече тој.
„Работиме на серија нови интересни операции, вклучително и во водите на Црното Море. Ви ветувам, ќе биде возбудливо, особено за непријателот“, рече Маљук.
Тој рече дека јулскиот напад со дронови е производ на повеќемесечна подготовка и заедничка операција со украинската морнарица, која ја водел заедно со морнаричкиот адмирал Олексиј Неижпап.
„Во последната фаза од подготовката, не можевме ни да размислуваме за спиење или храна“, изјави тој за Си-ен-ен. „Бевме целосно концентрирани на операцијата. Последните денови беа доста нервозни. Кога се случи експлозијата, бевме многу среќни и почнавме да си честитаме. Ова беше многу емотивен момент за сите нас и нашата победа сигурно ќе дојде наскоро“, вели шефот на СБУ.
Маљук рече дека западните партнери на Украина покажале интерес за нивните операции и желба да учат од нивното искуство.
„Тие не учествуваат во нашите операции, ниту ни даваат каква било опрема или нешто друго. Овие дронови се произведуваат во подземен производствен капацитет на територијата на Украина. Целите што ги споменав се легитимни според украинските и меѓународните закони“, заклучи тој.
