четврток, 30 мај 2024

„Приказната се чита“ – отворен Саемот на книгата

Под слоганот „Приказна се чита“ отворено е годинешното издание на Саемот на книга во Арената Борис Трајковски во Скопје. Како и претходните години присутни се речиси сите издавачи и автори од Македонија кои ги претставвуваат своите дела пред посетителите, а Саемот е надополнет и со повеќе издавачи од регионот, од Србија, Турција, Албанија, Косово и од други земји. Се организираат и средби со авторите, има и попусти за книгите, планирана е и програма за деца и млади.

Објавено на

часот

Сподели

Даниела Глигоровска, управител на Скопски Саем во своето обраќање денеска рече дека за време на саемските денови ќе понудат многу забава и дружење, весели моменти со омилени книги, автори, но и нови авантури испишани на страниците на новите книги со кои сите посетители ќе заминат од тука.

„Со отворањето на вратите на Арената официјално е отворено уште едно поглавје на 36-годишната приказна на Саемот на книга, која продолжува да инспирира и да ја храни нашата љубов за книгите и зборовите“, рече Глигоровска.

Писателката Фросина Пармаковска во своето обраќање денеска пред официјалното отворање на Саемот, рече дека за љубителите на пишаниот збор, Саемот на книга секогаш е вистински празник.

„Веќе илјадници пати сме слушнале дека јазикот е нашата татковина. Книгата на мајчиниот јазик е богатството на таа татковина. Но, што значи оваа преширока формулација за нас писателите? Таа татковина најизразено се протега во нашите книги, а тоа значи внатре во нас и надвор од нас, во нашата физичка татковина, но и во светот, во искуствата што ги собираме и складираме во теглички и отворајќи ги, ни ги открива најубавите вкусови и мириси. Таа татковина е во доцните ноќни часови каде што на најмагичниот начин низ страниците комуницираме со нашите читатели, Таа е соба со кауч пред психијатар кој мудро извлекува цели потонати градови од најголемите длабочини“, рече Пармаковска.

Таа, како што додаде, е од генерациите што израснале со магијата на книгата, но кои примијле богато книжевно наследство од книжевните предци, основоположниците на современата македонска литература.

„Како писатели денес со тоа наследство автоматски ја добивме одговорноста прво да го зачуваме, да го промовираме, а истовремено да создадеме нови трендови и писанија кои ќе сведочат за нашето време, за нашите предизвици, за нашата реалност која што сега и овде ја живееме“, рече Пармаковска.

Покровител на саемот е Министерството за култура. Во своето обраќање министерката Бисера Костадиновска Стојчевска рече дека ја радува посетеноста.

„Во една статија со апокалиптични сценарија се предвидува дека до 2050 човештвото ќе нема потреба од книги. Не можам да верувам, но можеби за генерациите што доаѓаат тоа ќе биде нормално. Ние, кои живееме во ова време, кое некои го нарекуваат преодно, сигурна сум дека не треба да се откажеме од тоа дека во неизвесни времиња мораме да ги негуваме и да ги браниме книгите како симбол на надеж и дијалог и како креативно осовременување на светот како патоказ. Новите технологии нека станат добри слуги. И како такви нека послужат во пренесување на пораката до младите дека приказната се чита. Во виртуелниот свет го нема овој опоен мирис на книгата“, рече министерката.

ТОП ВЕСТИ

ПОСЛЕДНИ ВЕСТИ