Законот е усвоен по забрзана процедура само еден ден откако го предложи партијата Фидес на премиерот Виктор Орбан. Малку им требаше на организациите за човекови права да се кренат на нозе и со приврзаниците да го блокираат мостот во центарот на Будимпешта.
Новиот закон, освен што ја забранува „Парадата на гордоста“ со образложеие дека би можела да биде штетна за децата, ѝ дозволува на полицијата да користи камери за препознавање на лица за да ги идентификува учесниците на настаните и да изрекува парични казни.
Премиерот на Унгарија е познат како критичар на ЛГБТ заедницата, поради што често доаѓа во судир со Европската Унија. И овој пат реагираа високи функционери на ЕУ со потсетување дека правото на собирање е основно човеково право и барање да се стави вето на законот .
Критики стигнаа и однатре – градоначалникот на Будимпешта и противник на политиката на Орбан Гергеј Карачоњи најави дека овогодинешната парада би можела да биде поголема од кога и да е.
„Будимпешта е град на слободата – прајдот ќе се одржи“, порача Карачоњи.
И покрај забраната, организаторите потврдија дека планираат да ја одржат овогодинешната парада на 28 јуни.
