„Претседателот Петро даде наредба да отвориме колумбиска амбасада во Рамала, претставништво на Колумбија во Рамала, тоа е следниот чекор што ќе го направиме“, рече Муриљо.
Муриљо додаде дека верува оти наскоро повеќе земји ќе почнат да се залагаат за признавање на палестинска држава пред Обединетите нации, што Колумбија веќе го поддржа.
Претходно овој месец, Петро, кој веќе го повлече колумбискиот амбасадор од Тел Авив, рече дека ќе ги прекине дипломатските врски со Израел поради неговите акции во Газа. Амбасадата беше затворена на 3 мај.
Петро жестоко го критикува израелскиот премиер Бенјамин Нетанјаху и побара да се приклучи на тужбата на Јужноафриканската Република, која го обвинува Израел за геноцид пред Меѓународниот суд на правдата.
Израелскиот министер за надворешни работи Израел Кац го обвини Петро дека е „антисемит и полн со омраза“ по одлуката на Колумбија да ги прекине врските со земјата, велејќи дека потегот е награда за Хамас.
Рамала, на Западниот Брег, служи како административен главен град на палестинската држава.
На 10 мај, Генералното собрание на Обединетите нации со големо мнозинство ја поддржа палестинската кандидатура да стане полноправна членка на ОН, што ја признава Палестина како квалификувана да се приклучи. Генералното собрание исто така препорача Советот за безбедност на ОН „поволно да го преиспита прашањето“.
Колумбија не е првата земја од Латинска Америка која ги прекина врските со Израел. Боливија ги прекина односите со Израел на крајот на октомври минатата година, додека неколку други земји од Латинска Америка, вклучувајќи ги Чиле и Хондурас, ги повлекоа своите амбасадори.
