„Од друга страна тоа што го прави СДСМ е обид да манипулира и обид да го навреди граѓанинот дека има кратко помнење. Ние работиме врз основа на нашата изборна програма за која на избори сме добиле близу 450.000 гласови од граѓаните и тоа е за нас сѐ“, вели Мицкоски.
Смета дека СДСМ преку соопштенија, како што вели, практично лиферуваат лаги во кои самите веруваат.
„Но во ред, тие нека продолжат да лажат, сега сѐ помалку ќе имаат можност да крадат, бидејќи тие што крадеа, многу скоро од денеска ќе бидат изведени пред лицето на правдата или сменети. Но, тие ќе си продолжат со лагата, а ние ќе продолжиме да работиме. Тоа е нашата цел, бидејќи нас нѐ инспирира поддршката од граѓаните, којашто ја добиваме секојдневно“, вели Мицкоски.
Тој истакна дека убава вест е и што близу 3.000 вработени во Национални шуми и Водостопанство добија плати, кои не им биле исплатени во изминатите четири месеци.
„Со ребалансот беа обезбедени повеќе од 350 милиони денари за исплата на овие плати, и добро е што ќе почнат да се исплаќаат. Променета е програмата, во Национални шуми, веќе легнаа средствата на сметките на вработените. Најдоцна во понеделник ќе бидат и во Водостопанство и така ќе продолжиме во иднина. Тука не треба да се потцени фактот дека со ребалансот обезбедивме плус милјарда денари за заостанати долгови за земјоделците, коишто претходната Влада им ги должи“, вели Мицкоски.
Премиерот порача дека една милјарда денари ќе предвидат и за почетокот на наредната година, со што како што вели, покрај редовната исплата на субвенциите за земјоделците ќе има и средства со кои ќе се вратат долговите кои ги направила Владата на СДСМ и ДУИ. Истакна дека информациите од терен говорат дека во моментов им се помага на производителите на сливи, лозарите, кои имаат рекордни откупни цени на грозјето, односно за 25 проценти се повисоки.
Премиерот вели дека веќе се работи и на најавите за развој и регулација на криптопазарот за што наскоро ќе биде изготвен и закон.
„Дел од посетите што беа и од САД и од други земји од Европа се со фокус на таа тема. Во следниот перид ќе излеземе со законска регулатива со која сето ова ќе биде регулирано и ќе значи повеќе прилив во Буџетот што ќе може да го користиме за капитални проекти“, рече Мицкоски.
