„Утрово разговарав со министерот за економија и труд, а претходниве ден-два добивам информации од Државниот пазарен инспекторат (ДПИ) дека најголемиот дел од трговците ги враќаат цените на претходното ниво. Го почитуваат укажувањето што јавно го упативме до нив. Очекувам тоа да продолжи, но состојбата редовно ќе се следи со интензивни контроли од страна на ДПИ,“ изјави Мицкоски по презентацијата на годишните резултати на Министерството за внатрешни работи.
Тој додаде дека доколку се забележи отстапување, Владата ќе преземе соодветни мерки.
„Последната мерка што Владата ја има на располагање е повторно ограничување или лимитирање на цените. Сепак, во овој момент најголемиот дел од трговците го почитуваат укажувањето,“ нагласи премиерот.
По поплаките од граѓаните за поскапувања на основните прехранбени производи кои не беа опфатени со акцијата „Новогодишна кошничка,“ Мицкоски завчера најави дека Владата ќе реагира „робусно“ доколку има потреба.
Министерот за економија, Бесар Дурмиши, потврди дека Државниот пазарен инспекторат е на терен и прави анализи за движењето на цените во изминатите три месеци. По завршувањето на анализите, ќе се разгледаат и потенцијални поригорозни мерки.
