„Спроведувањето на посета со услови не соодветствува со духот на партнерството, кое треба да се заснова на меѓусебно почитување и меѓусебна доверба, во врска со што на американскиот амбасадор му беше дадено детално објаснување“, се вели во соопштението на Министерството, пренесува Ехо Кавказа.
Американската амбасада во Грузија објави соопштение од амбасадорот Робин Даниган, во кое се наведува дека грузиските владини претставници добиле покана „да разговараат за сите прашања од стратешкото партнерство и американската помош со високи американски официјални лица“.
„За жал, грузиската страна претпочиташе да ја одбие оваа покана. Ја повикуваме грузиската влада да ја потврди својата посветеност на евроатлантската иднина на Грузија, како што е запишано во грузискиот устав“, се вели во соопштението.
„На 1-ви мај, грузискиот парламент го одобри во второ читање нацрт-законот „За транспарентност на странско влијание“, таканаречениот „закон за странски агенти“, по што демонстрантите се собраа пред зградата на парламентот барајќи повлекување на документот.
Полицајците употребија сила против нив, 15 демонстранти беа повредени, двајца се приведени. ЕУ и САД ја осудија употребата на насилство врз учесниците на масовните протести, незадоволни од усвојувањето на законот за „странски агенти“ и ги повикаа грузиските власти да го слушнат овој „јасен сигнал на народот кој сака слобода и демократија“.
Грузиската претседателка Саломе Зурабишвили вети дека ќе стави вето на документот доколку биде усвоен.
Владејачката партија Грузиски сон има доволно гласови да го усвои законот и покрај претседателското вето.
