„Не знам какви се изворите на медиумите“, рече Мицкоски за медиумските објави дека Рамадани се наоѓа во Косово.
Прашан како случајот ќе се одрази на односите со Србија посочи дека како Влада сакаат да градат добрососедски односи со сите држави без исклучок и без оглед дали е тоа Албанија, Грција, Србија…
Ова што се случува во нашиот правосуден систем, наведе Мицкоски, е само уште еден чекор повеќе кон тоа дека се потребни реформите за кои цело време апелирам.
„Два проценти доверба кај граѓаните резултира со вакви многу прашања и дилеми, зошто тоа се случува, како тоа се случува, зошто се носат вакви одлуки, зошто некој бега…Ова е уште една причина повеќе конечно да почнеме да се занимаваме со реформите во судско-обвинителскиот систем. Сите идеи кои имаат намера да бидат доставени до Владата од страна на експертите нека ги достават до крајот на месецов, а понатаму ние како Влада ќе мора да почнеме да ги реализираме реформите за кои нѐ гласале граѓаните“, рече Мицкоски.
Од МВР претходно потврдија дека Рамадани избегал од куќен притвор од домот на роднини во земјава.
2Од страна на надлежен судски орган доставена е документација до МВР за распишување на централна потерница за лицето Б.Р. бидејќи во моментов е недостапно за органите на прогонот. МВР презема мерки за пронаоѓање на лицето“, информираа од МВР.
Рамадани, врз основа на меѓународната потерница издадена до Интерпол од Србија, беше уапсен на 17 јули 2024 година на граничниот премин Јажинце и однесен на 30 дена екстрадиционен притвор во затворот во Шутка. Содржината на налогот за апсење се заснова на сомневањата на Србија дека Рамадани, како поранешен војник на ОВК, извршил воени злосторства во регионот на Неродиме.
На 1 август, мерката на Рамадани од надлежен македонски суд му беше преиначена од притвор во куќен притвор и тој, според решението, беше упатен на адреса во Скопје. Со оваа одлука се предвидуваше тој да остане во куќен притвор до 16 август.
Српскиот министер за внатрешни работи Ивица Дачиќ за време на посетата на граничниот премин Табановце на 25 јули побара од македонските власти да ѝ го екстрадираат Рамадани на Србија. Прашањето за неговата екстрадиција беше отворено и при посетата на министерот за внатрешни работи на Косово, Џељаљ Свечља на Скопје на 31 јули. Свечља рече дека Македонија е таа која треба да одлучува самостојно, обвинувајќи ја Србија дека има тенденција да ги расипува односите меѓу државите од Западен Балкан.
Рамадани, според косовските медиуми, е третиот државјанин на Косово како поранешен војник на ОВК, уапсен во Македонија врз основа на српска потерница. Гафур Дуголи и Томор Морина беа уапсени во минатото, но со судска одлука беа ослободени.
