Вооружениот напаѓач што се обиде да го убие поранешниот претседател Доналд Џ. Трамп една недела пред пукањето пребарувал на интернет детали за атентатот на Џон Ф. Кенеди, пишувајќи „Колку далеку бил Освалд од Кенеди?“, рече денеска директорот на ФБИ пред Комисијата за правосудство на Претставничкиот дом.
Се чини дека тој на 6 јули се пријавил да присуствува на митингот во Батлер, Пенсилванија, каде што Трамп се подготвуваше да зборува, додаде Реј.
„Тоа е пребарување што очигледно е значајно во однос на неговите планови“, рече Реј, истакнувајќи дека пребарувањата на напаѓачот во тоа време „станаа многу фокусирани на поранешниот претседател Трамп и на овој митинг“.
Информациите за историјата на пребарување на напаѓачот се само дел од неколкуте нови детали за пукањето што Реј им ги открил на претставниците за време на долгото сослушување.
Вооружениот напаѓач го посетил местото на митингот следниот ден и таму поминал околу 20 минути. Тој се вратил двапати на денот на пукањето, на околу 70 минути утрото, а потоа подоцна истото попладне, кога се чини дека околу 11 минути летал дрон во околината.
Напаѓачот му го раскрвави увото на Трамп, уби еден од присутните на трибините и тешко повреди уште двајца.
Снајперисти на Тајната служба го убија напаѓачот Томас Крукс (20), откако го најдоа на блискиот покрив. Крукс бил вооружен со пушка во стилот АР-15 и заедно со дронот во својот автомобил имал магацини за пушката и панцир. ФБИ успеало да ја реконструира патеката на летот на дронот, но не успеало да извади видео или слика од дронот.
Таткото на напаѓачот ја купил пушката пред повеќе од една деценија, но Реј, исто така, во средата открил дека синот ја купил пушката од својот татко и дека семејството дома имало 14 огнени оружја.
Досега, според Реј, ФБИ не нашло мотив за пукањето. Но Бирото продолжува да ги испитува електронските уреди на напаѓачот за дополнителни индиции за начинот на размислување и движењата на Крукс претходно.
„Се надеваме дека ќе откриеме повеќе“, рекол Реј. „Фер е да се каже дека сè уште немаме јасна слика за неговиот мотив“.
ФБИ има спроведено повеќе од 400 разговори и голем број вработени во Бирото се вклучени во истрагата.
За време на сведочењето пред Конгресот во понеделникот, Кимберли А. Читл, тогашната шефица на Тајната служба, се соочи со жестоки прашања и од демократите и од републиканците, постојано одбивајќи да одговори на прашањата за безбедносните пропусти што довеле до атентатот.
Официјалните лица што го истражуваат ова прашање, вклучително и претставниците на сослушувањата оваа недела, постојано се прашуваа зошто безбедносниот периметар на Тајната служба не ја вклучувал зградата од која пукаше напаѓачот и зошто ниту еден полицаец не бил стациониран таму за време на митингот. Тие, исто така, прашаа зошто на Трамп му било дозволено да излезе на бината кога органите на редот, вклучително и Тајната служба и локалната полиција, трагале по сомнително лице.
Во вторникот, соочена со сѐ почестите повици да се повлече, Читл поднесе оставка.
Од Реј не беше барана оставка бидејќи ФБИ не беше директно вклучено во заштитата на претседателот на 13 јули.
На сослушувањето на Читл во понеделникот, републиканскиот претседател на Комисијата за разузнавање на Претставничкиот дом, претставникот Мајкл Р. Тарнер од Охајо, рече дека Реј бил шокиран што Тајната служба не ги вклучила информациите за иранско сценарио за убиство на Трамп во процената на заканите на митингот на Трамп во Батлер.
Реј одбил да разговара за конкретни детали за иранската закана или други закани за националната безбедност.
„Мора да ја сфатиме дрскоста на иранскиот режим“, рече тој, додавајќи дека постои процес за навремено споделување на таквите информации со Тајната служба, вели Њујорк тајмс.
