„Таму трет ден е активен пожарот, иако денес беше мирно, сега пак е активен. Горат млади борови. Тука гаснат пожарникари од Кичево и 30 припадници на Армијата. Нема услови за гаснење од воздух, оти не спаѓа во тешките и приоритетни пожари и е пристапен за гаснење од земја“, рече Ангелов.
Тој утринава апелираше до граѓаните да го пријавувуваат секое сомнително движење ако забележат потпалувачи, а ако им е страв лично да се јават, нека му кажат на некој комшија, полицаец, вработен во ЦУК.
„Апелирам на голема внимателност. Не е наивен пожарот, и кај депонија или на сува трева брзо може да стигне до шума или да загрози човечки живот. Борбата против овие што палат мора да биде жестока, мора жестоко да возвратиме, бидејќи превенцијата е најдобриот начин. Тогаш кога ќе бидат казнети, тогаш ќе бидат внимателни. Нема никакво оправдување за ваквото несериозно однесување. Ќе барам дополнителни законски измени за строги казнувања на ваквите поведенија кои загрозуваат човечки животи и трошат државни ресурси“, истакна Ангелов.
На денешната владина седница беше одлучено мерките за превенција поради топлинскиот бран да важат и утре. Тоа значи дека се препорачува ослободување од работните обврски за најранливите групи население: бремените жени и лицата на возраст над 60 години, а и работодавачите да ги реорганизираат работните активности на градежните работници и на работниците што работат на отворено, со тоа што ќе се избегне вршење градежни и други работни активности на отворено во периодот од 11 до 17 часот.
Во градинките да не се практикува физичка активност и да не се изнесуваат децата на отворено во периодот од 11 до 17 часот.
„Единиците на локалната самоуправа, Црвениот крст и центрите за социјални работи во регионите зафатени со топлинскиот бран да им даваат помош на осамените, старите, изнемоштените лица и бездомниците“, препорачуваат од Владата.
