„Неприфатливо е општеството да се однесува на овој начин со своите деца. Многу сме загрижени што ситуацијата секоја година се влошува, трагедија е кога ги знаеме катастрофалните последици и за менталното здравје и за образованието“, изјави претставничка на агенцијата на ОН во Франција Аделин Хазан.
Таа оцени дека тоа е „флагрантно кршење на принципите на Меѓународната конвенција за правата на детето“, која Франција ја ратификувала.
„Што се однесува до адолесцентите, тие се изложени на ризици од трговија со луѓе и проституција кога живеат на улица. Време е децата, особено децата бездомници, да станат приоритет на владата во Франција“, рече Хазан.
Според податоците на барометарот на ФАС, најмалку 2.043 деца – од кои 467 на возраст под 3 години – останале во ноќта од 19 до 20 август без решение за сместување по барање на нивното семејство, испратено на бројот 115, кој е наменет за итна помош на бездомниците.
Ова е помалку од 3.000 деца колку биле регистрирани во октомври 2023 година, но тоа е бројка без преседан за време на период на враќање во училиште, зголемен за 3 отсто во однос на август 2023 година, 27 отсто во однос на 2022 година и 120 отсто во однос на 2020 година.
Ова зголемување „го илустрира систематскиот неуспех на политиката за сместување и домување“, оценуваат УНИЦЕФ и ФАС, истакнувајќи дека барометарот ги зема предвид само повиците упатени на бројот 115, не вклучувајќи ги децата кои живеат во сиромашни квартови или сквотови, па дури и малолетници без придружба.
Ситуацијата достигна нова пресвртна точка ова лето во Лион, каде што неколку жени се најдоа без покрив над главата со своите новороденчиња, според ФАС.
Претседателот на ФАС, Паскал Брис, потсети дека Владата во 2022 година се обврза да нема повеќе деца на улица, „обврска чие исполнување сè уште го чекаме“.
