Александар Смирнов ги излажал агентите на ФБИ во јуни 2020 година дека директорите поврзани со украинската енергетска компанија Бурисма им платиле на Хантер и Џо Бајден по 5 милиони долари во 2015 и 2016 година, соопштија вчера обвинителите. Смирнов му рекол на ФБИ дека директорот на Бурисма тврдел дека го ангажирал Хантер Бајден за „да ги заштити од сите видови проблеми преку својот татко“.
Дејвид Вајс, специјалниот адвокат што ја води кривичната истрага против Хантер Бајден, рече дека големата порота го обвини Смирнов за „создавање лажен и фиктивен документ“.
Вајс рече дека Смирнов (43) бил уапсен на меѓународниот аеродром Хари Рид во Лас Вегас, Невада, откако се вратил во САД од странство.
Доколку биде прогласен за виновен, Смирнов може да се соочи со затворска казна до 25 години.
„И покрај постојаното предупредување дека мора да му достави на ФБИ вистинити информации, а не фабрикувани докази, обвинетиот даде лажни, клеветнички информации“ за Бајденови, велат обвинителите во обвинението поднесено во федералниот суд.
Обвинението против Смирнов ги поткопува тврдењата на републиканците во Конгресот дека американскиот претседател е корумпиран и дека заработувал на бизнисот на својот син во Украина. Обвинувањата против Хантер Бајден станаа актуелни во Конгресот во текот на летото, бидејќи републиканците побараа од ФБИ да објави документ што ги содржи наводите додека се води истрага против Бајден и неговото семејство. Останува нејасно дали таквите наводи против Бајден се точни.
Адвокатот на Хантер Бајден, Абе Лоуел, рече дека обвинението ги потврдува повеќемесечните предупредувања дека „републиканците се вклучуваат во теории на заговор поттикнати од луѓе со политички агенди“.
Обвинителите истакнуваат дека Смирнов имал контакт со директорите на Бурисма, но дека тоа било само рутински. Тие нагласуваат дека контактот се случил во 2017 година, откако тогашниот американски претседател Барак Обама и неговиот потпретседател Бајден ја напуштиле функцијата.
Во тоа време, Џо Бајден не можел да влијае на политиката во САД, заклучија обвинителите.
