Руската инвазија на Украина го направи зајакнувањето на вооружените сили приоритет за полската владејачка партија Право и правда (ПиС), а со изборната кампања во полн ек, демонстрацијата на воено оружје нуди можност да се зајакне довербата во владата кога станува збор за одбраната. „Оваа парада ќе се разликува од претходните; ќе можеме да видиме како напредува процесот на модернизација на опремата на полската армија“, рече во неделата министерот за одбрана Мариуш Блашчак.
Парадата на вооружените сили се одржува на 103-годишнината од победата на Полска над Советскиот Сојуз во Битката за Варшава, а ќе учествуваат 2.000 војници од Полска и други членки на НАТО, придружени со воена опрема и 92 авиони.
Меѓу изложеното оружје се тенкови М1А1 Абрамс, купени од САД, јужнокорејски тенкови К2 и самоодни хаубици К9 и ракетни фрлачи ХИМАРС и системи за противвоздушна одбрана Патриот.
Полска произведува пешадиски борбени возила Борсук и оклопни транспортери Росомак, кои исто така ќе учествуваат на парадата. ПиС, кој е на власт од 2015 година, тврди дека парадата ќе покаже дека ја обновува војската по долгогодишно недоволно инвестирање од претходната администрација.
Партијата вети дека ќе ја удвои големината на армијата и оваа година ќе потроши околу четири отсто од бруто-домашниот производ за одбрана. Сепак, опозициските пратеници во полскиот парламент тврдат дека владата ја користи армијата за своја политичка корист.
„Користењето на полската армија за предизборна кампања е срам за ПиС. Не за политизација на армијата!“, напиша на социјалните мрежи Михал Шчерба, претставник на најголемата опозициска партија Граѓанска платформа (ПО).
ПиС сè уште е најсилната партија според повеќето анкети, но нејзината предност е тесна и тешко дека ќе освои мнозинство. На 15 октомври во Полска се одржуваат парламентарни избори, а во исто време во земјата ќе се одржат и неколку референдуми.
