„Имено поради прекинат договор на фирмата за чистење и одржување „Хигиена“ на сите објекти во МВР, додека траат надмудрувањата кој да го земе тендерот, ѓубрето и нечистотијата станаа нов проблем и нова мака за вработените во МВР. Сега чекаме да се појават и некои заразни болести додека се мерат силите, односно додека се чека да победи појакиот фаворит.
Бараме од министерот за внатрешни работи итно да се надмине овој сериозен проблем кој е настанат поради битките за профит.
Состојбата е крајно лоша со хигиената и истата станува алармантна бидејќи е доведена во прашање здравствената безбедност на вработените во МВР.
Да го потсетиме врвното раководство на МВР дека поради тендерски расчистувања и препукувања за финансиски интереси произлегува негрижата за здравјето на работниците. Затоа, прекинете го создадениот хаос и престанете да го прекршувате Законот за заштита од вознемирување на работното место кој гласи: „забранет е кој било вид на вознемирување на работно место, како и злоупотреба на правата на вознемирување на работно место“. Вработените како полициски службеници во своите работни задачи немаат обврска да го чистат ѓубрето и да рибаат тоалети во МВР.
Запрете ги понижувањата и мобингот над вработените, најдете итно решение за хаосот кој е настанат од прекинатото одржување на хигиената поради борбата за тендер клининг сервис“, реагира Синдикатот на македонската полиција.
