Како што се вели во информацијата на МВР, на 12 март 2025 во 17:15 часот во ОВР Берово било пријавено дека на место викано Црвени брегови бил забележан лиценциран извршител за погребални услуги во општина Берово како на градежна депонија фрла и закопува остатоци од починати лица, извадени од Градските гробишта во Берово.
Веднаш по добиената пријава, како што се додава во полициското соопштение во консултација со јавен обвинител и во содејство со ракувач со работна машина багер од јавното претпријатие за комунални работи во Берово, било извршено пребарување на посоченото место и на пошироката околина, но не биле пронајдени предмети кои потекнуваат од кривично дело, туку биле пронајдени само остатоци од градежен шут и остатоци од одпад.
По дополнително преземени мерки и по извршени разговори во ОВР Берово, во соопштението од МВР додаваат дека било дојдено до сознание дека лиценцираниот извршител на погребални услуги во повеќе наврати вршел ископување на стари гробови и ги фрлал остатоците од починатите лица на друга локација.
„Подоцна, по овластување на јавен обвинител, бил извршен увид на гробиштата во село Смојмирово и на удолницата на јужната страна биле пронајдени пет коски кои наликуваат на коски од човек. По целосно расчистување и документирање на случајот, ќе биде поднесена соодветна пријава“, се вели во соопштението на МВР во врска со случајот.
Директорот на комуналното претпријатие во Берово, Илија Рунтевски за МИА потврди дека е побарано интервенција од нивно возило по насоки на МВР, и дека нивна обврска е само одржување на гробиштата.
Лиценцираниот извршител на погребални услуги Перо Сивевски, за МИА ги демантира горенаведените тврдења и најави тужби за нарушување на угледот и честа која според него му е нанесена.
