Кривичната пријава до надлежното обвинителство против полицаецот Б.Б. ја поднесе Одделот за внатрешна контрола, криминалистички истраги и професионални стандарди при Министерството за внатрешни работи. Б.Б е полициски службеник во полициската станица за граничен надзор Пехчево при Регионалниот центар за гранични работи Исток.
Тој се сомничи за сторено кривично дело – малтретирање во вршење на службата, за што се одговара по член 143 од Кривичниот законик.
„На 13 април при преземање службени дејствија, пријавениот неовластено и прекумерно употребил физичка сила и извршил физичко насилство врз машко лице од селото Чифлик, пехчевско, при што со гумена палка-пендрек му нанел телесна повреда. Одделот за внатрешна контрола, криминалистички истраги и професионални стандарди ќе поднесе и предлог за поведување постапка за утврдување на дисциплинска одговорност и Б.Б. ќе биде суспендиран од работното место до завршување на постапката и ќе му биде одземено службеното оружје и муниција“, се вели во соопштението на МВР.
