Ветувањето доаѓа по заканата на новоизбраниот американски претседател Доналд Трамп дека ќе воведе царини од 25 отсто за канадски стоки кога ќе ја преземе функцијата во јануари, доколку земјата не ја заштити границата од протокот на нерегуларни мигранти и нелегални дроги.
Економистите велат дека ваквите царини би можеле да ѝ нанесат удар на канадската економија. Во објавувањето на деталите за планот, канадскиот министер за финансии и меѓувладини работи најави дека федералната влада ќе одвои 1,3 милијарди канадски долари (900 милиони американски долари) за планот за заштита на границите.
„Мерките ќе ја обезбедат нашата граница од протокот на илегална дрога и нерегуларна миграција, истовремено обезбедувајќи слободен проток на луѓе и стоки кои се во срцето на просперитетот на Северна Америка“, рече министерот Доминик Лебланк.
Петте столба на планот вклучуваат ставање крај на трговијата со фентанил, нови алатки за спроведување на законот, подобрена координација со американските полициски сили, зголемена размена на информации и ограничување на сообраќајот на границата.
Планирано е да се воведе група за воздушен надзор, која би вклучувала хеликоптери, беспилотни летала и надзорни кули. Владата ќе обезбеди финансирање на Канадската агенција за гранични услуги за обука на нови тимови кучиња за откривање нелегални дроги. Се чини дека планот на Канада одговара на загриженоста што Трамп јавно ја искажа во последниве недели: протокот на фентанил и недокументирани имигранти во САД.
Бројот на премини на американско-канадската граница е значително помал отколку на границата меѓу САД и Мексико, покажуваат податоците на американската гранична патрола за средбите со мигрантите, како и за запленетото количество фентанил. Мексико исто така се соочува со заканата на Трамп за царини од 25%.
Лебланк потврди дека тој и други официјални лица имале „прелиминарен“ разговор со „граничниот цар“ на Трамп, Том Хоман за новиот план. „Охрабрен сум од тој разговор“, рече Лебланк, кој присуствуваше на минатомесечниот состанок меѓу премиерот Џастин Трудо и Трамп во Мар-а-Лаго, Флорида.
Најавата за новите гранични мерки дојде за време на првиот ден на Лебланк како министер за финансии на Канада. Долгогодишниот сојузник на Трудо набрзина положи заклетва во понеделникот по ненадејната оставка на Кристи Фриленд, која беше и министерка за финансии и заменик-премиер.
Фриленд ја напушти функцијата во жестоко отворено писмо до Трудо во кое ги наведува своите несогласувања со него за трошењето и „најдобриот пат за Канада“. Нејзиното ненадејно излегување од кабинетот дополнително ја оптовари ослабената малцинска влада на Трудо.
