„Сите сомнежи за корупција мора да бидат истражени и санкционирани без компромис од страна на правосудните органи во Северна Македонија. Го охрабруваме целиот правосуден систем во државата да работи посветено и без двоумење на расчистување со сите форми на криминал и корупција, со цел да обезбеди праведност и еднаквост за сите граѓани. СДСМ останува доследна во својата заложба за изградба на праведно општество, во кое владеењето на правото и отчетноста ќе бидат темелите на нашата иднина“, се наведува во соопштението на СДСМ.
Поранешниот прв заменик претседател на Владата и министер за политички систем Артан Груби и неговто семејство како и судијата на Апелацискиот суд Скопје, Енвер Беџети се новите имиња на црната листа на САД. Ова е најновата одлука објавена денеска на официјалната веб страница на американската Влада. Американската амбасадорка во земјава, Анџела Агелер, на официјалната фејсбук страница на амбасадата напиша дека денешното назначување на Груби и Беџети е доказ дека политичкото мешање во судството не може и нема да се толерира.
Во отсуство на детални информации, од медиумите дознав за денешната одлука на Стејт департментот, напиша на својот фејсбук профил поранешниот заменик претседател на Владата, Артан Груби по неговото именување на црната листа на САД.
Претходно, Зијадин Села, коалицискиот партнер на ДУИ ја поздрави одлуката Груби да биде ставен на црната листа на САД и го повика Груби да се повлече од политиката и да се соочи со обвиненијата на американскиот Стејт Департмент.
