Илјадници луѓе се појавија на гласачките места низ Русија за да учествуваат на, како што рече опозицијата, мирен, но симболичен политички протест против реизборот на претседателот Владимир Путин. Во акцијата наречена „Пладне против Путин“, Русите што се против Путин излегоа на своето локално избирачко место точно напладне или за да ги поништат своите гласачки ливчиња во знак на протест или за да гласаат за еден од тројцата кандидати против Путин, кој се очекува убедливо да победи.
Меѓу поддржувачите на протестите се и приврзаниците на Алексеј Навални, активист што почина во казнена колонија на Арктикот минатиот месец.
Некои гласачи биле уапсени на избирачките места. Во извештајот се наведува дека една активистка била приведена додека излегувала од својот дом во Санкт Петербург.
Некои од уапсените набргу беа ослободени.
Тешко е да се процени колку луѓе учествувале на протестите. Должината на редиците на секое избирачко место прикажано на каналот на Навални се движи од неколку десетици луѓе до неколку стотици. Новинарите на Ројтерс напладне забележале благ пораст на бројот на гласачите, особено на помладите, на некои избирачки места во Москва и Јекатеринбург, а се формирале редици од неколку стотици луѓе. Некои рекле дека протестираат, иако е тешко да се разликуваат од другите гласачи.
Најголем број притворени се пријавени во Казањ (најмалку 29 лица) и во Москва (најмалку 19 лица). Најмалку седум притворени се пријавени во Санкт Петербург.
Во пресрет на изборите, голем број руски опозиционери, по поттик од Алексеј Навални, ги повикаа гласачите да се појават на гласачките места точно во 12 часот в недела за да се покаже колку граѓани не го поддржуваат владејачкиот режим. Во четвртокот, Московското обвинителство ги предупреди Русите дека учеството на протестот „Пладне против Путин“ ќе биде казниво со до пет години затвор.
Најмалку еден човек во Казањ за ОВД-инфо изјавил дека бил приведен специјално затоа што дошол да гласа во неделата напладне. Според локалниот медиум Гроза, полицијата на едно од избирачките места во градот одбила да ги пушти младите да гласаат во 12 часот, велејќи им да се вратат час или два подоцна.
Станислав Андрејчук, копретседавач на независната организација за набљудување на изборите „Голос“, во четвртокот објави дека на набљудувачите на изборите од регионалните граѓански комори на Русија им биле дадени упатства за идентификување на учесниците на протестот „Пладне против Путин“, во кој гласачите што се против Владимир Путин планираат да излезат на гласање точно во 12 часот на 17 март.
Андрејчук сподели белешка, наводно испратена од граѓанската комора во регионот Свердловск, во која изборните работници се советуваат да внимаваат на гласачите со симболи на Навални, бело-сино-бели знамиња, украински знамиња или „пацифистички симболи“, како и гласачи со „нервозно однесување кога ќе видат полицајци“.
Документот, исто така, наведува „вештачко градење толпа“, „гласно и агресивно однесување“ и залагање за Навални или против Путин и војната како знаци дека гласачот е дел од протестот.
Во 12 часот, се вели во меморандумот, набљудувачите на изборите треба да снимат две видеа „што ќе покриваат што е можно поголем дел од територијата и луѓето“ и внатре и надвор од секое избирачко место. Ако повеќе од три лица се соберат во една област пред избирачко место, документот ги советува набљудувачите да повикаат полиција. Ако луѓето што се собираат „будат сомнеж“, во меморандумот се повикува полицијата да ги провери нивните документи.
Во четвртокот вечерта, Московското обвинителство издаде предупредување до сите гласачи што планираат да учествуваат во иницијативата „Пладне против Путин“.
„Пладнето против Путин“ го смисли опозицискиот политичар од Санкт Петербург, Максим Резник, како начин безбедно да се протестира против Владимир Путин и да им се покаже на гласачите што му се противат дека не се сами. Тоа беше прифатено и од опозицискиот лидер Алексеј Навални пред неговата смрт на 16 февруари.
