Во својот прв говор за време на амбициозното 12-дневно патување во Југоисточна Азија, каде што христијаните се воглавно мало малцинство, папата Франциско рече дека Католичката црква ќе работи понапорно на меѓурелигискиот дијалог со надеж дека тоа ќе помогне во спречување на екстремизмот.
„На овој начин може да се елиминираат предрасудите и да расте климата на меѓусебно почитување и доверба“, рече 87-годишниот папа во обраќањето пред околу 300 политичари и верски лидери во претседателската палата Мердека во Џакарта.
„Ова е неопходно за да се соочиме со заеднички предизвици, кои вклучуваат спротивставување на екстремизмот и нетолеранцијата, кои ја искривуваат верата и се обидуваат да ги наметнат своите ставови користејќи измама и насилство“, рече Франциско.
Индонезија има население од околу 280 милиони жители, а се проценува дека околу 87 отсто се муслимани. Слободата на вероисповед е загарантирана со уставот.
Имаше неколку инциденти на екстремистичко насилство во земјата во последниве години, вклучително и напади на бомбаши самоубијци во 2021 и 2022 година поврзани со групата Џамах Аншарут Даула (ЈАД) инспирирана од Исламската држава.
Нападот во 2021 година се случи непосредно пред христијанскиот празник Велигден, при што беа ранети најмалку 19 лица.
Папата Франциско беше пречекан од многу луѓе. Тие вееја мали ватикански и индонезиски знамиња додека неговиот автомобил пристигнуваше во претседателската палата. Папата има болки во коленото и грбот, па патува во инвалидска количка.
Тој се сретна со индонезискиот претседател Џоко Видодо, кој ја напушта функцијата во октомври по 10 години на функцијата. Во својот јавен говор Папата не спомна конкретни насилни инциденти, но неколкупати спомена екстремизам, нетрпеливост и манипулација со религијата.
„Понекогаш верата во Бога за жал се манипулира за да се поттикне поделба и да се зголеми омразата наместо да се промовира мир, заедништво, дијалог, почит, соработка и братство“, рече папата Франциско.
Папата по Индонезија ќе патува во Папуа Нова Гвинеја, Источен Тимор и Сингапур.
