Со оваа иницијатива, финансиска помош во износ од 2.500 денари ќе добијат сите пензионери кои примаат старосна, инвалидска, семејна или социјална пензија, се жители на општина Кисела Вода и имаат месечни примања под 22.640 денари според јануарскиот пензиски чек за 2025 година. Дополнително, општината ќе го покрие и персоналниот данок, кој не е пресметан во овие средства. Средствата за оваа намена изнесуваат 7.000.000 денари и помошта ќе се доделува сè до нивно исцрпување.
„Со воведувањето на оваа финансиска поддршка, Општина Кисела Вода директно помага онаму каде што е најпотребно. Нашите највозрасни жители заслужуваат сигурност и достоинствен живот, а ние како локална самоуправа правиме сè што е во наша моќ да им го олесниме секојдневието. Оваа мерка е уште еден чекор во континуираната грижа за пензионерите, со која даваме конкретна финансиска помош, но и јасна порака дека тие не се заборавени,“ изјави градоначалникот Орце Ѓорѓиевски.
Тој потсети дека оваа иницијатива е дел од пошироката поддршка што Општина Кисела Вода ја обезбедува за своите највозрасни жители.
„Во изминатиот период воведовме бесплатен транспорт за пензионерите до здравствени и административни институции, проектот ‘Итно копче’ кој овозможува брза реакција во итни ситуации, како и програмата за грижа и нега на повозрасните лица. Сите овие мерки се резултат на нашата посветеност да создадеме општина во која секој пензионер ќе има подобар квалитет на живот. Ова не е еднократна акција, туку дел од долгорочна стратегија за подобрување на условите за нашите сограѓани,“ додаде градоначалникот Ѓорѓиевски.
Јавниот повик ќе биде објавен утре (06.03.2025) во весникот „Слободен печат“, како и на официјалната веб-страница на општината, каде што граѓаните ќе можат да ги најдат критериумите и сите дополнителни информации.
