Собраниската Комисија за европски прашања денеска продолжи со амандманската расправа за предл-законот. На седницата беа одбиени и три амандмани предложени од пратеничките Моника Зајкова и Маја Морачанин.
Пратеничката Вјолца Адеми од ДУИ побара пауза за да изготват и предложат амандман, а претседателот на Комисијата за европски прашања Арбер Адеми даде пауза од еден час.
Стојаноски нагласи дека лицемерно е да кажат власта дека сакат да ги заштитат учениците и притоа во овој закон дозволуваат онлајн коцкање со никаква забрана за каде тоа може да биде имплементирано.
„Во дневните соби и училниците ќе влезе онлајн коцкањето коешто со овие три лиценци потпишани од Артан Груби. Партизацијата на овој сектор или дуизацијата или артанизацијата која што е присутна можете да ја видете насекаде, од оние фирми кои ги добиваат тендерите на Државната лотарија, од директорот, од управните и надзорните одбори на сите овие компании кои добија лиценци а се четири на број – три лиценци за онлајн коцкање и едно за видео лотарија. Тука не се работи дека некој сака да ги заштити учениците и коцкарниците да ги тргне надвор од училиштата. Ако се сакаше тоа да се направи, тоа можеше да се направи само со една измена во членот 10“, рече Стојаноски.
Со измените и дополнувањата на Законот за игрите на среќа и за забавните игри се предлага ограничување на просториите во кои се приредуваат електронските игри на среќа, односно да може да се приредуваат само во простории на посебните игри на среќа за кои имаат добиено согласност од Министерството за финансии.
Со цел да се намали неограниченото отворање на уплатно исплатните места кај обложувалниците, односно на деловните простории кај автомат клубовите, а со тоа и да се оневозможи лесниот пристап на населението до игрите на среќа, се предлага воведување на ограничување на бројот на уплатно исплатни места на обложувалниците со издадената лиценца, како и ограничување на бројот на деловните простории на автомат клубовите што се отвораат со една издадена лиценца и воведување на надомест за секое ново уплатно-исплатно место за обложувалница и за секоја нова деловна просторија за автомат клуб.
Измените на Законот предвидуваат соработниците на друштвото кое поднело барање за лиценца или кои сакаат да влезат во постојно друштво кое има лиценца за игри на среќа да мора да поседуваат репутација, а деловните простории во кои се приредуваат игри на среќа во обложувалница и автомат клуб, томболата од затворен тип и електронските игри на среќа да се наоѓаат на оддалеченост не помалку од 500 метри од основни и средни училишта. Начинот на мерење на оддалеченоста, како што стои во предлогот, ќе се утврди со правилник пропишан од министерот за финансии.
Покрај тоа, како што понатаму се вели во текстот на законското решение,со измените и дополнувањата се воведува надзорен информациски систем за приредувачите на електронските и интернет игри на среќа, се зголемува месечниот надомест за лотариските и електронските игри на среќа, се посочува дека електронските игри на среќа ќе можат да се приредуваат во простории каде што се приредуваат посебните игри на среќа за кои имаат добиено согласност од Министерството за финансии и се воведува нов начин на пресметка и плаќање на посебната давачка кај приредувачите на посебните на среќа (казина, обложувалници и автомат клубови). Воедно, се зголемува надоместот за издавање на лиценца за обложувалница од 105.000 евра на 200.000 евра, се ограничува бројот на уплатно-исплатни места на 25 со една издадена лиценца. За секое следно уплатно-исплатно место над 25-тото, приредувачот плаќа надомест во износ од 10.000 евра.
Се зголемува и надоместот за издавање на лиценца за автомат клуб од 78.750 евра на 100.000 евра. Се прецизира дека лиценцата за приредување на игри на среќа во автомат клуб се однесува за три деловни простории и се воведува надоместок во износ од 30.000 евра. Се зајакнува регулативата и во делот на интернет игрите на среќа со имплементирање на препораката на Комисијата за принципите за заштита на потрошувачите и играчите на онлајн услугите за коцкање и за спречување на малолетници од коцкање преку интернет.
