Владата минатиот вторник го смени составот на комисијата назначувајќи го историчарот Ванчо Ѓорѓиев за нејзин претседател. Тој и претходно беше член на комисијата, но поднесе оставка обвинувајќи за притисоци од страна на тогашното Министерство за надворешни работи предводено од Бујар Османи.
Од стариот состав на комисијата остана само 1 член, додека меѓу останатите има двајца кои и претходно членувале во ова тело. Членови на комисијата се и д-р Александар Литовски, научен соработник при Институтот за национална историја во Скопје, д-р Митко Панов, научен советник при Институтот за национална историја во Скопје, д-р Никола Минов, вонреден професор на Филозофскиот факултет во Скопје при УКИМ – Скопје, доц. д-р Сашо Додевски, насловен доцент избран на Филозофскиот факултет во Скопје, д-р Бесник Емини, виш научен соработник на Институтот за духовно и културно наследство на Албанците – Скопје, д-р Димитар Љоровски, научен советник при Институтот за национална историја во Скопје.
Комисијата е формирана во 2017 година како дел од обврските со Договорот за добрососедство и пријателство со Бугарија. Досега оваа заедничка комисија усвоија препораки за заедничко чествување на Кирил и Методиј, Наум Охридски, Климент Охридски и Цар Самуил и пет препораки за измени во учебници во Македонија и во Бугарија.
