Мицкоски рече дека ги разбира политичките состојби во Грција имајќи го предвид предизборниот период поради европските избори, но додаде дека не очекува талибански однос и цензурирање во однос на човековото, како што рече, елементарно право како да се именува сопсствената држава.
„Сè што е дел од Преспанскиот договор, вклучително и делот за името, идната влада ќе го почитува. Впрочем, и решенија за пратеничкиот мандат што ги добивме се со придавката на името. Еве и законскиот предлог што денеска го доставивме е со таа придавка. Но мое човеково право, гарантирано со многу конвенции е правото на слобода на говор и изразувањето. Не им се лутам на политичари кога не го кажуваат целото име на нивната држава. За мене мојата татковина е Македонија и ќе остане Македонија. Целокупната институционална комуникација која е дел од законите и Уставот ќе биде почитувана додека се во сила. Не може да барате почитување на законите, а да сте лицемерни и да кажувате други работи. Во моите изјави името ќе биде Македонија“, рече Мицкоски.
Тој нагласи дека тоа ќе го каже и на Самитот на НАТО доколку биде отворено такво прашање.
„Ќе кажам дека ние сакаме да градиме мостови со јужниот, со истичниот, северниот и со западниот сосед и дека ние сме мирољубив народ и дека сакаме соработка и пријателство. Очекувам така да се однесуваат и соседите. Немам намера да се однесувам талибански, ниту пак очекувам талибанско однесување од кој било политичар. Можеме на кој било форум да отвориме дебата кој колку има реализирано од Преспанскиот договор, но сепак не би сакал да го губам времето, туку сакам разговори за инвестиции и развој“, нагласи Мицкоски.
Тој очекува утре од претседателката на Македонија да го добие мандатот за состав на новата влада и рече дека преговорите се речиси завршени.
„Мандатот ќе биде даден на јасно декларираното мнозинство при изборот на Африм Гаши за претседател на Собранието. Очекувам час поскоро да го поднесам составот на членови на идната влада, малку се размислуваме поради одредени верски празници кои се пред нас, Задушница и Рамазан, исто така и роденденот на ВМРО-ДПМНЕ 17 јуни, така што имаме неколку работи коишто треба да ги договориме во периодот што следи, но секако дека очекувам идната влада да биде изгласана пред крајниот рок што е дефиниран согласно закон и Устав“, рече Мицкоски.
На новинарско прашање за распределба на ресорите, кажа дека не сака да зборува за имиња, туку дека наскоро денеска ќе се знаат.
Запрашан за неспојливоста на функциите премиер и пратеник, посочувајчи го примерот со Талат Џафери, Mицкоски рече дека практиката и порано била таква.
„Не е за првпат Македонија да има и технички премиер кој е пратеник. Тоа беше Оливер Спасовски, беше и Емил Димитриев. Точно е дека е тоа сива зона во законите, не случајно споменав примери и со СДСМ и со ВМРО-ДПМНЕ, сега е тоа ДУИ со Талат Џафери. Треба час поскоро да го решиме законски ова прашање“, изјави Мицкоски согласувајќи се дека е тоа проблем кој се провлекува со години.
Тој оцени дека не треба да се трошат пари за локални избори во оние општини каде градоналниците ќе добијат функција во владата.
„Изборите се во десетиот месец од идната година, и иако можеби на ВМРО-ДПМНЕ ќе ни одговара да има избори, ние се залагаме да не се трошат пари кога таа функција до тогаш можат да ја извршуваат в.д. градоналалници“, рече лидерот на ВМРО-ДПМНЕ Христијан Мицкоски најавувајќи дека такво законско решенија се подготвува во Вреди.
