сабота, 19 октомври 2024

Не е лесно да се соберат потписите – Османи го одржа водството, следат Димитриевски и Ванковска

Наспроти победничките соопштенија, особено од седиштето на ДУИ, откаде се пласираат и фотографии за големи редици граѓани кои чекаат ред за да го дадат својот потпис за поддршка на претседателската кандудатура, се чини не е лесно да се дојде до потребната бројка од 10 илјади потписи. Сепак, за Бујар Османи од ДУИ заклучно со вчера, како што соопшти Државната изборна комисија (ДИК)  објавувајќи податоци, собрани се нешто повеќе од половината потребни потписи.

Објавено на

часот

Сподели

ДИК соопштува дека заклучно со вчерашниот ден собрани се вкупно 14.360 потписи за сите подносителите на кандидатура за претседател на државата.

Според пресекот на ДИК, најмногу потписи има Бујар Османи, кандидат на Демократската унија за интеграција (ДУИ) за кого се потпишале 5.405 граѓани. Втор на листата е лидерот на ЗНАМ-За наша Македонија, Максим Димитриевски со 3.613 собрани потписи. Кандидатката поддржана од партијата Левица, Билјана Ванковска-Цветковска има собрано 2.758 потписи, а кандидатот на ГРОМ, Стевчо Јакимовски има 1.974 потписи.

Сите останати на листата од 11 кандидати за шеф на државата имаат по помалку од илјада потписи – Вело Марковски има 249 потписи, а кандидатот на опозицискиот блок Вреди, Арбен Тарвари 246 потписи. Според податоците од ДИК, во овие два дена, ниту еден потпис нема за кандидатот Томе Николоски.

Државната изборна комисија, соопшти дека од денеска па додека трае собирањето потписи, еднаш дневно ќе прави пресек на пристигнатиот број на потписи за секој подносител поединечно и истиот редовно ќе се ажурира.

Постапката за собирање потписи, која почна на 23 февруари ќе трае непрекинато секој ден од 8 до 20 часот, а последниот ден на 8 март ќе работат до 24 часот. Собирањето потписи се одвива во сите подрачни одделенија и канцеларии на ДИК сместени во седиштата на 34 локални самоуправи и пред надлежните нотари.

Кога подносител на листа на кандидат за претседател е група избирачи, потребно е да се соберат најмалку 10.000 потписи од запишаните избирачи во Избирачкиот список, додека кога подносител на листа на кандидат за претседател се пратеници, потребно е да се соберат најмалку 30 потписи од пратениците.

Учесниците на изборите, листите со кандидати за претседател на државата треба да ги достават до ДИК најдоцна до 19 март, на полноќ. Рокот за собирање потписи се однесува и за претседателските и за парламентарните избори. Претседателските избори се закажани за 24 април, а вториот круг е на 8 мај кога треба да се одржат и парламентарните избори.

ТОП ВЕСТИ

ПОСЛЕДНИ ВЕСТИ