Светската здравствена организација (СЗО) и Германското здружение за исхрана се едногласни, препорачуваат воопшто да не се пие алкохол. Тие тврдат дека не постои безбедно количество алкохол.
Долго време, дури и некои научници веруваа дека умереното консумирање алкохол може да биде добро за здравјето и да штити од срцев и мозочен удар или дијабетес тип 2.
Тим Стоквел, поранешен директор на канадскиот институт за истражување на употребата на супстанции на Универзитетот во Викторија, тврди дека причината за таквите тврдења лежи пред се во начинот на кој биле спроведени овие студии, пренесува Дојче веле.
Повеќе од 1,4 милиони луѓе во Германија добиваат медицински третман поради зависност од алкохол.
Според податоците, повеќе од две третини од пациентите биле мажи. Најпогодена група се лицата на возраст од 55 до 64 години. Во таа возрасна група, во 2023 година, на околу 293.000 мажи и 114.000 жени им била дијагностицирана зависност од алкохол.
Дури и кај младите постои разлика меѓу групите кои умерено консумираат алкохол и оние кои воопшто не пијат, што се однесува до нивните услови за живот. Ова го утврдиле Тим Стоквел и неговите колеги во компаративна студија.
На пример, младите кои пијат една чаша вино или пиво дневно имаат, во просек, повисоки приходи, подобар пристап до здравствена заштита, помала попреченост и подобро образование. Сите овие се фактори кои придонесуваат за целокупното здравје.
Луѓето кои имаат подобра здравствена состојба и повремено пијат алкохол не се поздрави поради тоа консумирање, туку и покрај тоа. Чашата алкохол што понекогаш ја консумираат не е причина за нивната подобра здравствена слика.
Во случајот со постарите лица, резултатите од истражувањето честопати се дури и полажни. Имено, луѓето со хронични заболувања често целосно се откажуваат од алкохолот.
Во групата на апстиненти често спаѓаат луѓе кои се разболеле токму поради претходното прекумерно консумирање алкохол и сега веќе не пијат.
На прв поглед, се чини дека луѓето што пијат умерено алкохол се поздрави благодарение на повременото пиење вино или шампањ, но вистина лежи во нивното отсуство на основни болести, а не во алкохол.
Тим Стоквел наведува дека научниците често не ги земаат предвид таканаречените збунувачки фактори во своето истражување. Причината е што не е лесно да се изолираат од резултатите.
„Мислам дека речиси секогаш се работи за ненамерни грешки. Сепак, верувам дека постои и елемент каде што научниците прават такви грешки, а потоа се задоволни од резултатите“, вели Стоквел.
Покрај тоа, некои научници добиваат финансиска поддршка од индустријата за алкохол, која е заинтересирана за повеќе позитивни податоци.
И покрај митот за позитивното дејство на алкохолот, меѓу младите во Германија постои тренд на откажување од алкохолот веќе 15 години.
„Сувиот јануари“, односно целосното воздржување од конзумирање алкохол во текот на јануари, станува сè попопуларен и кај помладите генерации. Четири недели без алкохол веќе може да има позитивен ефект.
Многу е важно да се промовира одговорен однос кон алкохолот и обезбедување лесен пристап до услугите за лекување на зависности.
