вторник, 28 мај 2024

НАСА потпиша договор со три компании за изработка на прототип на лунарно возило

Три приватни компании – Интуитив машинс, Лунар аутпост и Вентури астролаб – во иднина ќе градат лунарни возила за американската вселенска агенција НАСА. Трите приватни вселенски компании се избрани за договор вреден вкупно 4,6 милијарди долари, објави НАСА на прес-конференција.

Фото: ЕПА

Објавено на

часот

Сподели

Секоја од трите компании сега ќе работи на прототип една година пред да се донесе одлука кое возило, како и кога ќе биде испратено на Месечината. Сите компании веќе некое време работат на слични проекти. Интуитив машинс го постигна првото комерцијално слетување на Месечината без екипаж во февруари. Во иднина, астронаутите ќе користат таканаречени „лунарни теренски возила“ за патување по површината на Месечината.

Прототип возилата, од кои едно ќе биде избрано за производство, мора да бидат способни да ги издржат екстремните услови на Месечината, а има и високи барања во однос на напојувањето, автономното возење, комуникацијата и навигацијата.

„Ова возило во голема мера ќе ја подобри способноста на нашите астронаути да истражуваат и спроведуваат научни експерименти на површината на Месечината, а исто така ќе служи како научна платформа помеѓу мисии со екипаж“, рече Ванеса Вајк, менаџер на вселенскиот центар Џонсон на НАСА во Хјустон, Тексас.

Со програмата Артемис, именувана по грчката божица на месечината Артемида, НАСА има за цел да испрати луѓе назад на Месечината за прв пат по повеќе од половина век – вклучувајќи ја и првата небела личност и првата жена. Долгорочната цел на Артемис е да воспостави постојана лунарна база како основа за мисии на Марс.

Меѓутоа, поради проблеми со ракетата и вселенското летало, НАСА мораше да ја одложи мисијата Артемис 2 со екипаж, првично планирана за ноември 2024 година, за септември 2025 година. Планираното слетување на Месечината Артемис 3 со екипаж требаше да биде одложено до септември 2026 година. Кинеската вселенска агенција во мај 2023 година објави дека планира да испрати луѓе на Месечината до 2030 година.

ТОП ВЕСТИ

ПОСЛЕДНИ ВЕСТИ