Пожарот во Итон кај Пасадена, кој однесе 17 животи од вкупно 25 потврдени досега смртни случаи, во средата беше локализиран речиси 50 отсто, јави ДПА.
Пожарот во Палисејдс, кој зафати голема површина на западниот раб на Лос Анџелес, едвај да се шири во последните денови, соопштија локалните власти.
Според првичните проценки, повеќе од 12.000 згради се уништени или оштетени во областа.
Временската прогноза за следните неколку дена, со слабеење на ветерот и пад на температурата, конечно даде повод за надеж дека најакутната фаза од оваа катастрофа веројатно е завршена.
Сепак, пожарникарите сѐ уште се во состојба на готовност бидејќи опасните ветрови од Санта Ана во секој момент можат да ја искомплицираат ситуацијата.
Повеќето црвени предупредувања за пожари во погодените области завршуваат во средата навечер по локално време, соопшти метеоролошката служба на Лос Анџелес.
Само околу 82.000 луѓе останаа под наредба за евакуација, рече шерифот на округот Роберт Луна.
Американските медиуми објавија дека расте незадоволството кај жителите, од кои многумина ги напуштиле своите домови. Опожарените области остануваат опколени и не е одреден датум кога жителите ќе се вратат во своите домови.
Обвинителот Нејтан Хохман претходно оваа недела поднесе обвинение против десет осомничени разбојници, провалници и пиромани.
