„Тие градови ги нема, а ние продолжуваме да му даваме милијарди долари на човек кој одби да склучи договор, на Зеленски. Не постои договор што не би бил подобар од ситуацијата што ја имате во моментов. Имате земја која е збришана, не е можно повторно да се изгради“, рече тој за време на предизборен митинг во Минт Хил, Северна Каролина.
Оваа изјава доаѓа во време кога на Капитол Хил расте гневот на републиканците кон Зеленски. Во Претставничкиот дом републиканските претставници се обидуваат да истражат кои средства од американските даночни обврзници отишле за поддршка на безбедноста на украинскиот претседател додека тој патува за Пенсилванија, пишува Си-ен-ен.
Во исто време, републиканските сенатори го предупредуваат Зеленски да се држи понастрана од внатрешната политика на САД, откако тој го нарече Џеј Ди Венс, потпретседателскиот кандидат на Трамп, „премногу радикален“ во интервју објавено минатиот викенд.
На Генералното собрание на Обединетите нации, Зеленски ги предупреди светските лидери дека Русите ќе ги интензивираат нападите врз енергетската инфраструктура на Украина, вклучително и нуклеарните централи. Реакцијата на Трамп изгледаше рамнодушна. „Секогаш кога ќе дојдеше во нашата земја, ќе си заминеше со 60 милијарди долари. Тој е веројатно најдобриот трговец во светот“, рече Трамп.
Во својот говор, Трамп ги обвини Џо Бајден и Камала Харис за руската инвазија на Украина, велејќи дека тие ја „предизвикале оваа ситуација со глупостите што ги кажуваа, со секој свој потег“.
„Тие едноставно не знаат што да прават. Тие се заробени во ситуацијата. Тажно е, едноставно не знаат што да прават. Бидејќи Украина ја нема, тоа повеќе не е Украина. Никогаш не можете да ги замените тие градови, и никогаш не можете да ги замените мртвите луѓе, толку многу мртви“, предупреди Трамп.
Тој рече дека постигнувањето договор претходно во конфликтот за отстапување на одредена територија на Русите би спречило нова катастрофа. Трамп тврди дека Бајден требало да договори договор меѓу Русија и Украина за да се избегне какво било крвопролевање. Тој повтори дека дури и „лош договор“, како и оној во кој Украина „малку ќе попушти“, ќе биде подобар од војна.
„Можеше да се направи договор. Никој немаше да умре“, додавајќи дека: „Договор можеше да се склучи доколку имавме компетентен претседател“.
Но, тој смета дека можност за склучување договор повеќе не постои поради уништувањето што се случило. „Каков договор можеме да направиме? Земјата е уништена. Луѓето се мртви. Земјата е во руини. И кои се тие луѓе кои дозволија ова да се случи? Кои се тие луѓе?“ се запраша тој.
