„Ѓаволите“ загубија на првите два натпревари, па вечерва против Копенхаген мораа да победат за да ги задржат шансите за нок-аут фаза во Лигата на шампиони.
Избраниците на Тен Хаг иако важеа за големи фаворити, тешко стигнаа до трите бода и тоа со помош на Хари Мегваер и Андре Онана, кои не се многу омилени и трпат критики поради слабите партии.
Дефанзивецот се најде на право место во 72. минута и центаршутот на Ериксен го претвори во водство од 1-0.
За трите бода да останат на Олд Трафорд се погрижи Андре Онана, кој во 97. минута го одбрани ударот на Џордан Ларсон од белата точка, откако Мектоминеј стартуваше несмасно и направи пенал.
Елиф Елмас и Наполи славеа со 0-1 на гостувањето кај Унион Берлин, Македонецот шанса доби на стартот од второто полувреме.
Со истот резултат Реал Сосиедад славеше кај Бенфика, а до гостински победи стигнаа и Реал Мадрид против Брага, и Арсенал против Севиља, на двата меча беше 1-2.
Победник денеска немаше само на натпреварот помеѓу Ленс и ПСВ, кој заврши со 1-1.
