„Очекуваме до крајот на годината или најдоцна во јануари да биде распишан тендерот за изградба на централна депонија во Свети Николе и претоварните станици. Станува збор за финансиски пакет од околу 40-ина милиони евра само за исток и североисток којшто опфаќа опрема што ја набавивме пред три години, канти, контејнери и возила“, рече Шукова во одговор на прашање при денешната посета на Кочани.
Финансискиот пакет, како што кажа, предвидува и затворање на општинските депонии.
„Првиот тендер е во фаза на имплементација, дел од депониите почнаа да се затвораат и се пренасочува отпадот од помалите депонии во моментот кон поголемите сѐ до нивно затворање. Финално е изградбата на централната станица во Свети Николе и претвораните станици од коишто ќе се носи отпадот во Свети Николе“, појасни Шукова.
Ова, нагласи таа, е прв посериозен проект за управување со отпад во државата.
„Тука не застануваме, продолжуваме и со другите региони со новиот заем од Европска банка за обнова и развој којшто ќе опфати уште пет региони во државата“, потенцира Шукова.
