Се вели дека станува збор за стотици деца, кои британската влада во минатиот век ги испратила од сиромашни работни семејства или згрижувачки домови во „училишта на фарми“ во Австралија и Канада за „подобри можности и образование“, а потоа претрпеле сексуална злоупотреба, објави Гардијан.
Фондот на принцот е правно одговорен за побарувањата на преживеаните, откако го презеде Фербриџ, добротворна организација фокусирана на Обединетото Кралство, која некогаш ги водела училиштата на фармите.
Иако Високиот суд во Велика Британија минатата година ја процени вредноста на барањата на преживеаните од злоупотребата на Фербриџ на околу 204.000 фунти (околу 234.000 евра) по лице, креаторите на шемата за компензација им рекоа на оштетените страни дека ќе добијат само околу еден процент од таа бројка поради „недоволно пари“ издвоени од фондот за гореспоменатите побарувања.
Претставниците на преживеаните ја нарекоа исплатата „бедна и крајно неправедна“ и „навредлива“.
Здружението „Олд Фербриџ“, група што ги претставува преживеаните од Фербриџ, му пиша на кралот Чарлс изразувајќи ја својата голема загриженост за однесувањето на Фондот на принцот, за да го повика да бара посоодветна компензација за преживеаните.
Во писмото до Чарлс, членот на одборот на здружението Дејвид Хил, кој бил испратен од Есекс во австралиско земјоделско училиште на возраст од 12 години во 1950-тите, го повика кралот да интервенира за да се исправи она што тој го нарекува неправда.
„Телото кое претходно беше одговорно за сексуална, физичка и емоционална злоупотреба на стотици деца на фармата Фербриџ, некои на возраст од пет години, има намера на секој преживеан да му плати до приближно 3.820 австралиски долари (2.400 фунти) или, во многу случаи, помалку од тоа“ изјави Хил.
Фербриџ датира од 1909 година, кога е основан како дел од планот за испраќање млади од сиромашните квартови на Велика Британија во колониите на Комонвелтот да работат на фарми, делумно, според неодамнешното национално истражување за злоупотреба на деца во Обединетото Кралство, и да се зголеми уделот на белците во кралските колонии и како обид да се реши проблемот со детската сиромаштија, пишува Гардијан.
Извештајот од 2018 година на Независната истрага за сексуална злоупотреба на деца (ИИЦСА) заклучи дека Фербриџ не успеал да ги заштити децата од четири земјоделски училишта во Австралија, Канада и Јужна Родезија (сега Зимбабве) од сексуална злоупотреба.
