Од МВР појаснуваат дека по извршените проверки во службениот материјал и увид во видео снимките од радар за 6 мај 2024, констатирано е дека двајца полициски службеници, постапувајќи по наредба за мерење на брзината на движење на возила со радар на автопатот Скопје-Велес, констатирале сообраќаен прекршок, односно измериле брзина на движење на моторно возило порше од 272 километри на час, на место каде движењето било ограничено на 120 километри на час со сообраќаен знак.
„Наместо да изготват записник за констатиран прекршок и прекршочен платен налог, имајќи предвид дека за ваков вид на прекршок е предвидена глоба во износ од 400 евра во денарска противвредност и забрана за управување со моторно возило од шест до 12 месеци, на сторителот му изготвиле само предупредување за сторен сообраќаен прекршок. Началникот на мобилната единица за безбедност на сообраќајот на патиштата побарал од началникот на оддел за униформирана полиција – сектор за сообраќајни работи да не биде напишана казна за сторениот прекршок, поради што началникот на одделот извршил влијание врз полициските службеници да не констатираат прекршок, туку само да изречат предупредување“, велат од МВР.
Против четворицата полициски службеници поднесен е и предлог за поведување на постапка за потешко кршење на работниот ред и дисциплина.
